أضف كلمات أغنية
(4,925) مشاهدة


باي باي

معقول يا ولاد
بنقول باي باي؟
وخلاص المدرسة فايتينها
شوفوا الأيام بتمر إزاي؟
مش لسة يا دوبك داخلينها
معقول يا ولاد
بنقول باي باي؟
يا دوب عرفنا أسماء بعضينا
لحقت تعدي سنين علينا
وخلاص بنقول
باي باي على طول
يا مدرستنا يا حبيبتنا
باي باي باي باي

فتناكي بعافية يا شبابيك
عقلنا كان يسرح براها
وتجينا م المجهول مزازيك
تنادينا وآدينا طاوعناها
وانتا يا دي الملعب
وانتي يا دي التوتة
كانت حدوتة
وتوتة توتة
وخلاص بنقول
باي باي على طول
يا مدرستنا يا حبيبتنا
باي باي باي باي

رايحين وجايين سوا
صحبة تلات سنوات
ف المدرسة الطيبة
ندرس ولاد وبنات
عرفنا نحسب
شعاع الشمس بالخطوة
لكن أوان الوداع
ما عملنالوش حسابات
خلصنا بدري
وقالولنا يلا
هنروح الجامعة
يارب إن شاء الله
وخلاص بنقول
باي باي على طول
يا مدرستنا يا حبيبتنا
باي باي باي باي

يا ما غيرنا اتجمعوا قبلينا
واتفرقوا تاني ونسيوا زمان
لكن احنا خصوصي لوحدينا
لازم نفضل أهل وخلان
دي عشرة حلوة
حرام تضيع
مرت يا عيني
سريع سريع
وخلاص بنقول
باي باي على طول
يا مدرستنا يا حبيبتنا
باي باي باي باي


 

 كلمات: صلاح جاهين
 ألحان: سيد مكاوي
 تاريخ: 1976

التبليغ عن خطأ