أضف كلمات أغنية
(2,438) مشاهدة


يا وابور قول لي

يا وابور قول لي رايح على فين
يا وابور قول لي وسافرت منين
يا وابور قول لي

عمال تجري قبلي وبحري
تنزل وادي تطلع كوبري
حوِد مره وبعدين دُغري
ما تقول يا وابور رايح على فين
صوتك يدوي وانت بتهوي
والبعد أليم ناره تكوي
والارض بساط وانت بتطوي
ما تقول يا وابور رايح على فين

يا وابور قول لي رايح على فين
يا وابور قول لي وسافرت منين
يا وابور قول لي

قربت غريب وبعدت قريب
وجمعت حبيب على شمل حبيب
والقرب نصيب والبعد نصيب
ما تقول يا وابور رايح علي فين
إن طال الوقت على الركاب
يجري كلامهم في سؤال وجواب
بعد شوية يبقوا احباب
وده يعرف ده رايح على فين

أنا رحت معاك ورجعت معاك 
وأنا إيه كان مقسوم لي وياك
دي كانت نظره من هنا لهناك
العين عرفت رايحين علي فين
يا وابور

 كلمات: احمد رامي
 ألحان: محمد عبد الوهاب
 تاريخ: 1938





التبليغ عن خطأ



share