يا فهد ما قويت اصبر عن الزين ساعة
والله اني أعددها ثواني ودقايق
خذ فؤادي حبيبي واحتفظ به وداعة
يابو بندر دخيلك قلبي اشعل حرايق
واوصل الزين وخذ مني لقلبي إشاعة
كود يعرف حبيبي ما خفا من حقايق
وانشده ما سبب هذا الجفا والقطاعة
قبل ما يباح سدي وينفضح للخلايق
وين هاك الوفـا أيـام كنا جمـاعـة
كم تمنيت أشوفه وعاقني عنه عــايق
لو طلبني عيوني قلت سمع وطاعة
بعد فرقا حبيبي صدري اليوم ضايق